jo maza zaKHm-e-jigar dard-e-nihan mein aae

jo maza zaḳhm-e-jigar dard-e-nihāñ meñ aa.e

aah meñ kaif na vo lutf fuġhāñ meñ aa.e

aaj sach bolne kī maiñ ne jasārat kī thī

kyoñ na phir zaḳhm bhalā merī zabāñ meñ aa.e

shahr-e-jāñ meñ na huā jab koī pursāñ un kā

mere aañsū mire dāman kī amaañ meñ aa.e

zindagī nuqta-e-āġhāz hai aur kuchh bhī nahīñ

kaash anjām bhī kuchh us kā gumāñ meñ aa.e

mil ga.ī kashmakash-e-vahm-o-yaqīñ se manzil

jab bhī ham kār-gah-e-shīsha-garāñ meñ aa.e

ḳhūn-e-gul jab rag-e-har-ḳhār se jaarī ho jaa.e

kyoñ na phir lutf bahāroñ kā ḳhizāñ meñ aa.e

guftugū pyaar kī ham us se kareñ kaise 'zuhūr'

baat karnā jise nafrat kī zabāñ meñ aa.e

jo maza zaKHm-e-jigar dard-e-nihan mein aae

aah mein kaif na wo lutf fughan mein aae

aaj sach bolne ki main ne jasarat ki thi

kyon na phir zaKHm bhala meri zaban mein aae

shahr-e-jaan mein na hua jab koi pursan un ka

mere aansu mere daman ki aman mein aae

zindagi nuqta-e-aghaz hai aur kuchh bhi nahin

kash anjam bhi kuchh us ka guman mein aae

mil gai kashmakash-e-wahm-o-yaqin se manzil

jab bhi hum kar-gah-e-shisha-garan mein aae

KHun-e-gul jab rag-e-har-KHar se jari ho jae

kyon na phir lutf bahaaron ka KHizan mein aae

guftugu pyar ki hum us se karen kaise 'zuhur'

baat karna jise nafrat ki zaban mein aae