jo mehrban kahin wo rashk-e-mah ho jawe

jo mehrbāñ kahīñ vo rashk-e-māh ho jaave

to ye gadā bhī kabhī bādshāh ho jaave

jo apnī sho.ala-fagan barq-e-āh ho jaave

to kāḳh-e-charḳh bhī jal kar tabāh ho jaave

do chaar gar mirī un kī nigāh ho jaave

to sab mo.āmla phir rū-barāh ho jaave

kareñ safed bhī ghar ko mire agar me.amār

to dūd-e-āh se fauran siyāh ho jaave

shab-e-visāl kī aatī haiñ yaad yuuñ bāteñ

ki ḳhvāb meñ koī jyuuñ bādshāh ho jaave

jo jā.ūñ aaj kī shab un kī bazm meñ tanhā

to mujh pe ġhair kā kaash ishtibāh ho jaave

yahī duā hai ki anjām ho ba-ḳhair mirā

ḳhudā kare ki butoñ se nibāh ho jaave

nigāh-e-lutf jo ġhairoñ pe hai to behtar hai

kabhī idhar bhī karam kī nigāh ho jaave

tire itaab kī lazzat se ye tamanna hai

ki aaj bhī koī mujh se gunāh ho jaave

zamāna tum pe hai ġhash kyā ajab jo hashr ke din

mirā gavāh tumhārā gavāh ho jaave

mile bhī huur jo zāhid ko ḳhuld meñ jā kar

mazā ho vaañ jo use zo.af-e-bāh ho jaave

nikālo 'sehr' vo mazmūn tab.a-e-ālī se

jahāñ meñ jis ke sabab vāh-vāh ho jaave

jo mehrban kahin wo rashk-e-mah ho jawe

to ye gada bhi kabhi baadshah ho jawe

jo apni shoala-fagan barq-e-ah ho jawe

to kaKH-e-charKH bhi jal kar tabah ho jawe

do chaar gar meri un ki nigah ho jawe

to sab moamla phir ru-barah ho jawe

karen safed bhi ghar ko mere agar meamar

to dud-e-ah se fauran siyah ho jawe

shab-e-visal ki aati hain yaad yun baaten

ki KHwab mein koi jyun baadshah ho jawe

jo jaun aaj ki shab un ki bazm mein tanha

to mujh pe ghair ka kash ishtibah ho jawe

yahi dua hai ki anjam ho ba-KHair mera

KHuda kare ki buton se nibah ho jawe

nigah-e-lutf jo ghairon pe hai to behtar hai

kabhi idhar bhi karam ki nigah ho jawe

tere itab ki lazzat se ye tamanna hai

ki aaj bhi koi mujh se gunah ho jawe

zamana tum pe hai ghash kya ajab jo hashr ke din

mera gawah tumhaara gawah ho jawe

mile bhi hur jo zahid ko KHuld mein ja kar

maza ho wan jo use zoaf-e-bah ho jawe

nikalo 'sehr' wo mazmun taba-e-ali se

jahan mein jis ke sabab wah-wah ho jawe