jo mera le gaya dil kaun wo insan hai kya hai

jo merā le gayā dil kaun vo insān hai kyā hai

parī hai yā malak yā huur yā ġhilmān hai kyā hai

nazar zulfoñ pe us kī jā paḌī jis kī lagā kahne

ye donoñ saañp haiñ yā kākul-e-pechān hai kyā hai

gayā huuñ bhuul sab kuchh duḳhtar-e-raz jaise haath aa.ī

jigar hai jaan hai īmān hai īqān hai kyā hai

hamāre yaar ke kuchh darmiyāñ jo baat bol uTThe

raqīb-e-rū-siyah ġhammāz yā shaitān hai kyā hai

zamīñ par jhāñkte haiñ roz-o-shab aflāk se kis ko

mah-o-ḳhur yā kisī kā dīda-e-hairān hai kyā hai

mire rone ko dekhā hijr meñ jis ne so yuuñ bolā

jhaḌī barsāt kī yā mauja-e-tūfān hai kyā hai

ba-josh-e-ishq laTke hai nahīñ mujh ko tamīz itnī

ba-mizhgāñ laḳht-e-dil yā dur hai yā marjān hai kyā hai

mirī chhātī pe rakh kar dast kī tashḳhīs hukamā ne

ye siina kān-e-gandhak yā ki ātish-dān hai kyā hai

jale siine se duud uTThā dimāġh āshufta kar Daalā

mukarrar dil bhunā yā phir jigar biryān hai kyā hai

na bhuul ai ḳhizr mar jaanā hai āḳhir Tuk jiyā to kyā

agar mādām hai kyā hai vagar yak aan hai kyā hai

fanā-fishshaiḳh ho, tafrīq 'afrīdī' na kar hargiz

nabī hai yā alī yā hāfiz-e-qur.ān hai kyā hai

jo mera le gaya dil kaun wo insan hai kya hai

pari hai ya malak ya hur ya ghilman hai kya hai

nazar zulfon pe us ki ja paDi jis ki laga kahne

ye donon sanp hain ya kakul-e-pechan hai kya hai

gaya hun bhul sab kuchh duKHtar-e-raz jaise hath aai

jigar hai jaan hai iman hai iqan hai kya hai

hamare yar ke kuchh darmiyan jo baat bol uTThe

raqib-e-ru-siyah ghammaz ya shaitan hai kya hai

zamin par jhankte hain roz-o-shab aflak se kis ko

mah-o-KHur ya kisi ka dida-e-hairan hai kya hai

mere rone ko dekha hijr mein jis ne so yun bola

jhaDi barsat ki ya mauja-e-tufan hai kya hai

ba-josh-e-ishq laTke hai nahin mujh ko tamiz itni

ba-mizhgan laKHt-e-dil ya dur hai ya marjaan hai kya hai

meri chhati pe rakh kar dast ki tashKHis hukama ne

ye sina kan-e-gandhak ya ki aatish-dan hai kya hai

jale sine se dud uTTha dimagh aashufta kar Dala

mukarrar dil bhuna ya phir jigar biryan hai kya hai

na bhul ai KHizr mar jaana hai aaKHir Tuk jiya to kya

agar madam hai kya hai wagar yak aan hai kya hai

fana-fishshaiKH ho, tafriq 'afridi' na kar hargiz

nabi hai ya ali ya hafiz-e-quran hai kya hai