jo meri aah se nikla dhuan hai meri miTTi ka

jo merī aah se niklā dhuāñ hai merī miTTī kā

mire andar nihāñ ātish-fishāñ hai merī miTTī kā

diye haiñ taaq par raushan magar zau mere andar hai

jo kuchh kuchh tīrgī hai vo samāñ hai merī miTTī kā

mire jalvoñ kī pāmālī na dekhī jā.egī mujh se

hunar kuchh is tarah se rā.egāñ hai merī miTTī kā

zarūr us kī shabāhat merī sochoñ se alag hogī

tasavvur meñ jo dekhā hai gumāñ hai merī miTTī kā

samundar aur dariyā haiñ purāne āshnā mere

barastā hai jo paanī mehrbāñ hai merī miTTī kā

mire ash.ār meñ āfāq-o-anfus kī kahānī hai

mirā har lafz-e-shīrīñ tarjumāñ hai merī miTTī kā

'ovaisī' qalb-o-jāñ karte rahe sher-o-adab ko ham

agarche ye bhī jins-e-rā.egāñ hai merī miTTī kā

jo meri aah se nikla dhuan hai meri miTTi ka

mere andar nihan aatish-fishan hai meri miTTi ka

diye hain taq par raushan magar zau mere andar hai

jo kuchh kuchh tirgi hai wo saman hai meri miTTi ka

mere jalwon ki pamali na dekhi jaegi mujh se

hunar kuchh is tarah se raegan hai meri miTTi ka

zarur us ki shabahat meri sochon se alag hogi

tasawwur mein jo dekha hai guman hai meri miTTi ka

samundar aur dariya hain purane aashna mere

barasta hai jo pani mehrban hai meri miTTi ka

mere ashaar mein aafaq-o-anfus ki kahani hai

mera har lafz-e-shirin tarjuman hai meri miTTi ka

'owaisi' qalb-o-jaan karte rahe sher-o-adab ko hum

agarche ye bhi jins-e-raegan hai meri miTTi ka