jo meri aankhon se jhankti hai teri kahani hai ya nahin hai

jo merī āñkhoñ se jhāñktī hai tirī kahānī hai yā nahīñ hai

agar nahīñ hai to phir batāo ye rā.egānī hai yā nahīñ hai

kisī ke shajre meñ kyā likhā hai mujhe ġharaz hī nahīñ hai is se

zabāñ khulegī to ilm hogā vo ḳhāndānī hai yā nahīñ hai

maiñ apnī tanhā.ī tan pe oḌhe palaT rahā huuñ ye dekhne ko

vo aaj bhī apnī bevafā.ī pe pānī-pānī hai yā nahīñ hai

agar ye tai hai ki āsmāñ par banā.e jaate haiñ saare rishte

to phir batāo hamārī joḌī bhī āsmānī hai yā nahīñ hai

maiñ un se 'shahbāz' pūchhtā huuñ ki sāhab-e-eqtidār logo

batāo logoñ ke dil meñ rahnā bhī hukmrānī hai yā nahīñ hai

jo meri aankhon se jhankti hai teri kahani hai ya nahin hai

agar nahin hai to phir batao ye raegani hai ya nahin hai

kisi ke shajre mein kya likha hai mujhe gharaz hi nahin hai is se

zaban khulegi to ilm hoga wo KHandani hai ya nahin hai

main apni tanhai tan pe oDhe palaT raha hun ye dekhne ko

wo aaj bhi apni bewafai pe pani-pani hai ya nahin hai

agar ye tai hai ki aasman par banae jate hain sare rishte

to phir batao hamari joDi bhi aasmani hai ya nahin hai

main un se 'shahbaz' puchhta hun ki sahab-e-eqtidar logo

batao logon ke dil mein rahna bhi hukmrani hai ya nahin hai