jo meri chhat ka rasta chand ne dekha nahin hota

jo merī chhat kā rasta chāñd ne dekhā nahīñ hotā

to shāyad chāñdnī le kar yahāñ utrā nahīñ hotā

duā.eñ do tumheñ mash.hūr ham ne kar diyā varna

nazar-andāz kar dete to ye jalvā nahīñ hotā

abhī to aur bhī mausam paḌe hai mere saa.e meñ

maiñ bargad kā shajar huuñ muddatoñ būḌhā nahīñ hotā

hasīnoñ se tamannā-e-vafā kam-zarf rakhte haiñ

ye aisā ḳhvāb hai jo umr-bhar puurā nahīñ hotā

baḌe ehsān haiñ mujh par tirī ma.asūm yādoñ ke

maiñ tanhā rāsto meñ bhī kabhī tanhā nahīñ hotā

maiñ jab jab sher kī gahrā.iyoñ meñ Duub jaatā huuñ

sivā tere mire dil meñ koī chehra nahīñ hotā

jo meri chhat ka rasta chand ne dekha nahin hota

to shayad chandni le kar yahan utra nahin hota

duaen do tumhein mashhur hum ne kar diya warna

nazar-andaz kar dete to ye jalwa nahin hota

abhi to aur bhi mausam paDe hai mere sae mein

main bargad ka shajar hun muddaton buDha nahin hota

hasinon se tamanna-e-wafa kam-zarf rakhte hain

ye aisa KHwab hai jo umr-bhar pura nahin hota

baDe ehsan hain mujh par teri masum yaadon ke

main tanha rasto mein bhi kabhi tanha nahin hota

main jab jab sher ki gahraiyon mein Dub jata hun

siwa tere mere dil mein koi chehra nahin hota