jo meri ghazlon ki tanzil ka muamla hai

jo merī ġhazloñ kī tanzīl kā mu'āmla hai

vo merā aur mire jibrīl kā mu'āmla hai

banā rahā huuñ maiñ kāġhaz pe lafz lafz khañDar

dil-e-tabāh kī tamsīl kā mu'āmla hai

maiñ kyā batā.ūñ mire ashk chhup rahe haiñ kahāñ

ye merī aañkh kī zambīl kā mu'āmla hai

charāġh-e-tūr tirā tazkira 'abas hai yahāñ

yahāñ to ġhaar kī qindīl kā mu'āmla hai

idhar bhī peshvā tā'dād meñ ziyāda haiñ

udhar bhī chaar anājīl kā mu'āmla hai

har ik badan kī ikaa.ī hai do meñ poshīda

ye kā.enāt kī takmīl kā mu'āmla hai

ye ham jo ho ke mukammal bhī nā-mukammal haiñ

ḳhudā ke hukm kī tā'mīl kā mu'āmla hai

milā hai ādam-o-havvā ko nisf nisf vujūd

ye saare dahr kī tashkīl kā mu'āmla hai

is ādhe-pan kī zarūrī hai puurī puurī samajh

jo pūre-pan kī tafāsīl kā mu'āmla hai

ye ḳhadd-o-ḳhāl ke e'rāb sar se paañv talak

badan sahīfoñ kī tartīl kā mu'āmla hai

basar rahā hai ġhazal tiis saal se 'vāsif'

ye mat samajh ki ye tā'jīl kā mu'āmla hai

jo meri ghazlon ki tanzil ka mu'amla hai

wo mera aur mere jibril ka mu'amla hai

bana raha hun main kaghaz pe lafz lafz khanDar

dil-e-tabah ki tamsil ka mu'amla hai

main kya bataun mere ashk chhup rahe hain kahan

ye meri aankh ki zambil ka mu'amla hai

charagh-e-tur tera tazkira 'abas hai yahan

yahan to ghaar ki qindil ka mu'amla hai

idhar bhi peshwa ta'dad mein ziyaada hain

udhar bhi chaar anajil ka mu'amla hai

har ek badan ki ikai hai do mein poshida

ye kaenat ki takmil ka mu'amla hai

ye hum jo ho ke mukammal bhi na-mukammal hain

KHuda ke hukm ki ta'mil ka mu'amla hai

mila hai aadam-o-hawwa ko nisf nisf wujud

ye sare dahr ki tashkil ka mu'amla hai

is aadhe-pan ki zaruri hai puri puri samajh

jo pure-pan ki tafasil ka mu'amla hai

ye KHadd-o-KHal ke e'rab sar se panw talak

badan sahifon ki tartil ka mu'amla hai

basar raha hai ghazal tis sal se 'wasif'

ye mat samajh ki ye ta'jil ka mu'amla hai