jo mil gaya hai yahan jalwa-e-KHayali hai

jo mil gayā hai yahāñ jalva-e-ḳhayālī hai

ye baat ham ne mohabbat meñ aazmā lī hai

ajiib saltanat-e-ishq meñ nizām milā

jo bādshāh nazar aatā hai ik savālī hai

tumhārī yaad baḌhī aur dil huā raushan

ye ek sham.a añdhere ne ḳhud jalā lī hai

hunar kī aag jalā.ī hai ḳhaak se us ne

kamāl us kā hī hai merī be-kamālī hai

sadā ye sochtā huuñ us kā faiz kyā likkhūñ

ki merā dost bhī aur aadmī misālī hai

kabhī diyā bhī hai lamha kisī ko chāhat kā

to zindagī ne ye fursat kabhī churā lī hai

kirāya-dārī vasīla hai apne jiine kā

tum aanā chāho to dil kā makān ḳhālī hai

kabhī to jhāñko zarā is kī aag ke pīchhe

ye aadmī ki jo zāhir meñ lā-ubālī hai

jo mil gaya hai yahan jalwa-e-KHayali hai

ye baat hum ne mohabbat mein aazma li hai

ajib saltanat-e-ishq mein nizam mila

jo baadshah nazar aata hai ek sawali hai

tumhaari yaad baDhi aur dil hua raushan

ye ek shama andhere ne KHud jala li hai

hunar ki aag jalai hai KHak se us ne

kamal us ka hi hai meri be-kamali hai

sada ye sochta hun us ka faiz kya likkhun

ki mera dost bhi aur aadmi misali hai

kabhi diya bhi hai lamha kisi ko chahat ka

to zindagi ne ye fursat kabhi chura li hai

kiraya-dari wasila hai apne jine ka

tum aana chaho to dil ka makan KHali hai

kabhi to jhanko zara is ki aag ke pichhe

ye aadmi ki jo zahir mein la-ubaali hai