jo milne aata hai mil kar juda bhi hota hai

jo milne aatā hai mil kar judā bhī hotā hai

vo ḳhush-mizāj hai lekin ḳhafā bhī hotā hai

vo bhuul baiThe nasha kar ke apnī daulat kā

nasha koī bhī ho ik din huā bhī hotā hai

kabhī kabhī hī sahī jeb bhārī hotī hai

kabhī kabhī to ye banda ḳhudā bhī hotā hai

maiñ is hasīn ko ye baat kaise samjhā.ūñ

jo behtarīn hai us se sivā bhī hotā hai

tumhārī baat kā maiñ ne burā kahāñ maanā

jo apnā hotā hai us se gilā bhī hotā hai

kisī marīz se kahnā ki aap achchhe haiñ

ye baat kahne kā matlab davā bhī hotā hai

ye baat mere sivā jāntā nahīñ koī

ki us kī baat meñ gahrā nasha bhī hotā hai

kabhī jo gāliyāñ de maañ to ye samajh lenā

ki us kī gaalī kā matlab duā bhī hotā hai

jo milne aata hai mil kar juda bhi hota hai

wo KHush-mizaj hai lekin KHafa bhi hota hai

wo bhul baiThe nasha kar ke apni daulat ka

nasha koi bhi ho ek din hua bhi hota hai

kabhi kabhi hi sahi jeb bhaari hoti hai

kabhi kabhi to ye banda KHuda bhi hota hai

main is hasin ko ye baat kaise samjhaun

jo behtarin hai us se siwa bhi hota hai

tumhaari baat ka main ne bura kahan mana

jo apna hota hai us se gila bhi hota hai

kisi mariz se kahna ki aap achchhe hain

ye baat kahne ka matlab dawa bhi hota hai

ye baat mere siwa jaanta nahin koi

ki us ki baat mein gahra nasha bhi hota hai

kabhi jo galiyan de man to ye samajh lena

ki us ki gali ka matlab dua bhi hota hai