jo meri pusht mein paiwast hai us tir ko dekh

jo mirī pusht meñ paivast hai us tiir ko dekh

kitnī ḳhush-rang nazar aatī hai tasvīr ko dekh

raqs kartā huā maqtal meñ chalā aayā huuñ

paañv mat dekh mire paañv kī zanjīr ko dekh

koī neza mire siine meñ alam hotā hai

mirī shah-rag pe chamaktī huī shamshīr ko dekh

ḳhud ko ījād maiñ kartā huuñ na.e tarz pe roz

ai mirī jaan kabhī tū mirī tā'mīr ko dekh

merī āñkhoñ meñ kisī ḳhvāb ne dam toḌ diyā

merī palkoñ se ulajhtī huī tā'bīr ko dekh

kyā hai duniyā ke ḳharābāt meñ vahshat ke sivā

mujh meñ ābād mire shahr-e-asātīr ko dekh

itnī ujlat thī ki maiñ ḳhud ko vahīñ chhoḌ aayā

kaun detā hai sadā kūcha-e-tāḳhīr ko dekh

mire alfāz kī duniyā kī kabhī sair to kar

ham se kuchh ḳhāk-nashīnoñ kī bhī jāgīr ko dekh

dekh 'shāhid' ko samajhnā koī āsān nahīñ

itnā dushvār nahīñ huuñ mirī tahrīr ko dekh

jo meri pusht mein paiwast hai us tir ko dekh

kitni KHush-rang nazar aati hai taswir ko dekh

raqs karta hua maqtal mein chala aaya hun

panw mat dekh mere panw ki zanjir ko dekh

koi neza mere sine mein alam hota hai

meri shah-rag pe chamakti hui shamshir ko dekh

KHud ko ijad main karta hun nae tarz pe roz

ai meri jaan kabhi tu meri ta'mir ko dekh

meri aankhon mein kisi KHwab ne dam toD diya

meri palkon se ulajhti hui ta'bir ko dekh

kya hai duniya ke KHarabaat mein wahshat ke siwa

mujh mein aabaad mere shahr-e-asatir ko dekh

itni ujlat thi ki main KHud ko wahin chhoD aaya

kaun deta hai sada kucha-e-taKHir ko dekh

mere alfaz ki duniya ki kabhi sair to kar

hum se kuchh KHak-nashinon ki bhi jagir ko dekh

dekh 'shahid' ko samajhna koi aasan nahin

itna dushwar nahin hun meri tahrir ko dekh