jo muddaton mein kisi shoKH ka shabab aaya

jo muddatoñ meñ kisī shoḳh kā shabāb aayā

rahīn-e-dāman-o-minnat-kash-e-hijāb aayā

numūd-e-shām huī vaqt-e-iztirāb aayā

jahān-e-ishq-o-mohabbat meñ inqalāb aayā

junūñ meñ ziist thī apnī tilism-e-bedārī

qazā ne aa ke sulāyā to ham ko ḳhvāb aayā

na dil meñ dard hī baaqī hai ab na aañkh meñ ashk

aḳhīr vaqt hai pāyān-e-iztirāb aayā

bas ab tamām huā intizār qāsid kā

ki zindagī kī taraf se hameñ javāb aayā

ġhazab thī bazm meñ saaqī kī tarz-e-mastāna

bharā huā na koī sāġhar-e-sharāb aayā

nizām-e-ālam-e-furqat ḳhilāf-e-qudrat thā

na māhtāb hī niklā na āftāb aayā

'nazar' iqāmat-e-duniyā kī ḳhatm muddat hai

ki ham bhī piir hue vaqt-e-pā-turāb aayā

jo muddaton mein kisi shoKH ka shabab aaya

rahin-e-daman-o-minnat-kash-e-hijab aaya

numud-e-sham hui waqt-e-iztirab aaya

jahan-e-ishq-o-mohabbat mein inqalab aaya

junun mein zist thi apni tilism-e-bedari

qaza ne aa ke sulaya to hum ko KHwab aaya

na dil mein dard hi baqi hai ab na aankh mein ashk

aKHir waqt hai payan-e-iztirab aaya

bas ab tamam hua intizar qasid ka

ki zindagi ki taraf se hamein jawab aaya

ghazab thi bazm mein saqi ki tarz-e-mastana

bhara hua na koi saghar-e-sharab aaya

nizam-e-alam-e-furqat KHilaf-e-qudrat tha

na mahtab hi nikla na aaftab aaya

'nazar' iqamat-e-duniya ki KHatm muddat hai

ki hum bhi pir hue waqt-e-pa-turab aaya