جو مسکرا رہے ہیں بہت میری بات پر

جو مسکرا رہے ہیں بہت میری بات پر

آ کر وہ تبصرہ بھی کریں ان نکات پر

پہلے تو ہر امید کا خوں کر دیا گیا

سر لا کے رکھ دیا گیا پھر میرے ہات پر

ایسی بھی کوئی ذات ہے اس کائنات میں

انگلی کبھی اٹھی نہ ہو جس کی حیات پر

دنیا کو کیا ثبوت دکھاؤ گے سوچ لو

قائم نہیں رہے گا وہ کل اپنی بات پر

سورج کے ڈوبتے ہی اندھیرے تو بڑھ گئے

قابو رکھا ہے چاند ستاروں نے رات پر

افضلؔ غزل کے فن سے ہے کیا تیرا واسطہ

تیری گرفت کیا ہے بتا لفظیات پر