jo muskura rahe hain bahut meri baat par

jo muskurā rahe haiñ bahut merī baat par

aa kar vo tabsira bhī kareñ un nikāt par

pahle to har umiid kā ḳhuuñ kar diyā gayā

sar lā ke rakh diyā gayā phir mere haat par

aisī bhī koī zaat hai is kā.enāt meñ

uñglī kabhī uThī na ho jis kī hayāt par

duniyā ko kyā subūt dikhāoge soch lo

qaa.em nahīñ rahegā vo kal apnī baat par

sūraj ke Dūbte hī añdhere to baḌh ga.e

qaabū rakhā hai chāñd sitāroñ ne raat par

'afzal' ġhazal ke fan se hai kyā terā vāsta

terī giraft kyā hai batā lafziyāt par

jo muskura rahe hain bahut meri baat par

aa kar wo tabsira bhi karen un nikat par

pahle to har umid ka KHun kar diya gaya

sar la ke rakh diya gaya phir mere hat par

aisi bhi koi zat hai is kaenat mein

ungli kabhi uThi na ho jis ki hayat par

duniya ko kya subut dikhaoge soch lo

qaem nahin rahega wo kal apni baat par

suraj ke Dubte hi andhere to baDh gae

qabu rakha hai chand sitaron ne raat par

'afzal' ghazal ke fan se hai kya tera wasta

teri giraft kya hai bata lafziyat par