جو نہیں کہنا تھا خود سے بارہا کہتی رہی

جو نہیں کہنا تھا خود سے بارہا کہتی رہی

ان سنی کرتی رہی ہوں ان کہا کہتی رہی

وقت کی تبدیلیاں میری چمک کو کھا گئیں

اور میں تبدیلیوں کو ارتقا کہتی رہی

خود سے اکثر پوچھتی ہوں ایک سادہ سا سوال

حبس کو میں کس لیے باد صبا کہتی رہی

جانے کیوں سمجھی تھی میری بات کو سمجھو گے تم

ایک ہی میں بات تم سے بے وجہ کہتی رہی

کہتے رہنے سے ندامت کم نہیں ہوتی مگر

میں غلط ہوں ہاں غلط ہوں برملا کہتی رہی

حق تو یہ ہے اب مجھے سب نا سمجھ کہتے رہیں

تیرے جیسے بے وفا کو با وفا کہتی رہی

جی حضوری بھی جو کی تو پوری آب و تاب سے

زندگی کو بندگی کا فلسفہ کہتی رہی

نازیہؔ اس بات کی جتنی ملے کم ہے سزا

کیا سمجھ کے میں تجھے اپنا خدا کہتی رہی