jo nahin kahna tha KHud se barha kahti rahi

jo nahīñ kahnā thā ḳhud se bārhā kahtī rahī

an-sunī kartī rahī huuñ an-kahā kahtī rahī

vaqt kī tabdīliyāñ merī chamak ko khā ga.iiñ

aur maiñ tabdīliyoñ ko irtiqā kahtī rahī

ḳhud se aksar pūchhtī huuñ ek saada sā savāl

habs ko maiñ kis liye bād-e-sabā kahtī rahī

jaane kyoñ samjhī thī merī baat ko samjhoge tum

ek hī maiñ baat tum se be-vajah kahtī rahī

kahte rahne se nadāmat kam nahīñ hotī magar

maiñ ġhalat huuñ haañ ġhalat huuñ barmalā kahtī rahī

haq to ye hai ab mujhe sab nā-samajh kahte raheñ

tere jaise bevafā ko bā-vafā kahtī rahī

jī-huzūrī bhī jo kī to puurī āb-o-tāb se

zindagī ko bandagī kā falsafa kahtī rahī

'nāziya' is baat kī jitnī mile kam hai sazā

kyā samajh ke maiñ tujhe apnā ḳhudā kahtī rahī

jo nahin kahna tha KHud se barha kahti rahi

an-suni karti rahi hun an-kaha kahti rahi

waqt ki tabdiliyan meri chamak ko kha gain

aur main tabdiliyon ko irtiqa kahti rahi

KHud se aksar puchhti hun ek sada sa sawal

habs ko main kis liye baad-e-saba kahti rahi

jaane kyon samjhi thi meri baat ko samjhoge tum

ek hi main baat tum se be-wajah kahti rahi

kahte rahne se nadamat kam nahin hoti magar

main ghalat hun han ghalat hun barmala kahti rahi

haq to ye hai ab mujhe sab na-samajh kahte rahen

tere jaise bewafa ko ba-wafa kahti rahi

ji-huzuri bhi jo ki to puri aab-o-tab se

zindagi ko bandagi ka falsafa kahti rahi

'naziya' is baat ki jitni mile kam hai saza

kya samajh ke main tujhe apna KHuda kahti rahi