jo nahin us jahan rote hain

jo nahīñ us jahāñ rote haiñ

hāsil-e-rā.egāñ ko rote haiñ

dukh zamīñ kā to baañT sakte nahīñ

aur zamān-o-makāñ ko rote haiñ

reza reza paḌā hai āñkhoñ meñ

ġham ke koh-e-girāñ ko rote haiñ

dil-girafta ḳhamosh rātoñ meñ

shor-hā-e-sagāñ ko rote haiñ

mausamoñ kī bahār meñ ham sab

apnī apnī ḳhizāñ ko rote haiñ

jā nikalte haiñ ġham zamānoñ meñ

niiñd meñ raftagāñ ko rote haiñ

vaqt ke be-navā musāfir ham

an-sunī dāstāñ ko rote haiñ

kashtiyāñ bhar ga.iiñ samundar se

ham abhī bādbāñ ko rote haiñ

ham zamīnoñ pe reñgne vaale

kis liye āsmāñ ko rote haiñ

kuchh bhī hotā nahīñ jo rone ko

be-sabab īn-o-āñ ko rote haiñ

apne malbe pe baiTh kar 'nāsir'

dar-o-dīvār jaañ ko rote haiñ

jo nahin us jahan rote hain

hasil-e-raegan ko rote hain

dukh zamin ka to banT sakte nahin

aur zaman-o-makan ko rote hain

reza reza paDa hai aankhon mein

gham ke koh-e-giran ko rote hain

dil-girafta KHamosh raaton mein

shor-ha-e-sagan ko rote hain

mausamon ki bahaar mein hum sab

apni apni KHizan ko rote hain

ja nikalte hain gham zamanon mein

nind mein raftagan ko rote hain

waqt ke be-nawa musafir hum

an-suni dastan ko rote hain

kashtiyan bhar gain samundar se

hum abhi baadban ko rote hain

hum zaminon pe rengne wale

kis liye aasman ko rote hain

kuchh bhi hota nahin jo rone ko

be-sabab in-o-an ko rote hain

apne malbe pe baiTh kar 'nasir'

dar-o-diwar jaan ko rote hain