jo nazar aata tha bahar se wo kab andar se tha

jo nazar aatā thā bāhar se vo kab andar se thā

us ke jiine kā salīqa us ke pas-manzar se thā

shaam hote hī udāsī gher letī thī use

rābta us kā kahīñ kyā Dūbte manzar se thā

quvvat-e-parvāz pā kar bhī kahāñ jaatā parind

us ke uḌne kā ta.alluq kuchh to mere ghar se thā

fard thā jis ghar kā us ne bhī na pahchānā use

marne vaale shaḳhs kā nām-o-nasab to sar se thā

guzre lamhoñ kī sadā.eñ der tak aatī rahīñ

kuchh to rishta jaane vāloñ kā ujaḌte ghar se thā

jo nazar aata tha bahar se wo kab andar se tha

us ke jine ka saliqa us ke pas-manzar se tha

sham hote hi udasi gher leti thi use

rabta us ka kahin kya Dubte manzar se tha

quwwat-e-parwaz pa kar bhi kahan jata parind

us ke uDne ka talluq kuchh to mere ghar se tha

fard tha jis ghar ka us ne bhi na pahchana use

marne wale shaKHs ka nam-o-nasab to sar se tha

guzre lamhon ki sadaen der tak aati rahin

kuchh to rishta jaane walon ka ujaDte ghar se tha