jo nur dekhta hun main jam-e-sharab mein

jo nuur dekhtā huuñ maiñ jām-e-sharāb meñ

vo āftāb meñ hai na vo māhtāb meñ

is tarah azm-e-zohd hai ahd-e-shabāb meñ

chalne kā jaise qasd kare koī ḳhvāb meñ

merī nazar se chhup ke raheñ vo hijāb meñ

mere nadīm kyā mah-o-anjum haiñ ḳhvāb meñ

mujh ko sunā.e jaate haiñ afsāne ḳhuld ke

Duubā huā huuñ mastī-e-sher-o-sharāb meñ

āḳhir tilism-e-ġhuncha-o-gul TuuT kar rahā

merī nazar se chhup na sake vo hijāb meñ

insān khā rahā hai fareb-e-hayāt kyuuñ

kashtī kabhī ravāñ bhī huī hai sarāb meñ

begāna-e-nazar the hamīñ is kā kyā ilaaj

shāmil haiñ rahmateñ bhī kisī ke itaab meñ

har manzar-e-jamīl pe go ruk ga.ī nazar

Thahre magar tumhīñ nigah-e-intiḳhāb meñ

merā har ik nafas hai payām-e-razā-e-dost

zāhid phañsā huā hai azāb-o-savāb meñ

har manzar-e-jamīl ko Thukrā ke ai 'ra.īs'

ḳhud sāmne hoñ apnī nazar ke javāb meñ

jo nur dekhta hun main jam-e-sharab mein

wo aaftab mein hai na wo mahtab mein

is tarah azm-e-zohd hai ahd-e-shabab mein

chalne ka jaise qasd kare koi KHwab mein

meri nazar se chhup ke rahen wo hijab mein

mere nadim kya mah-o-anjum hain KHwab mein

mujh ko sunae jate hain afsane KHuld ke

Duba hua hun masti-e-sher-o-sharab mein

aaKHir tilism-e-ghuncha-o-gul TuT kar raha

meri nazar se chhup na sake wo hijab mein

insan kha raha hai fareb-e-hayat kyun

kashti kabhi rawan bhi hui hai sarab mein

begana-e-nazar the hamin is ka kya ilaj

shamil hain rahmaten bhi kisi ke itab mein

har manzar-e-jamil pe go ruk gai nazar

Thahre magar tumhin nigah-e-intiKHab mein

mera har ek nafas hai payam-e-raza-e-dost

zahid phansa hua hai azab-o-sawab mein

har manzar-e-jamil ko Thukra ke ai 'rais'

KHud samne hon apni nazar ke jawab mein