جو اوجھل ہے نگاہوں سے وہ منظر دیکھ سکتی ہوں

جو اوجھل ہے نگاہوں سے وہ منظر دیکھ سکتی ہوں

میں اب پرچھائیوں میں تیرا پیکر دیکھ سکتی ہوں

کسی کے ہجر نے بخشی ہے ایسی روشنی مجھ کو

میں تنہائی ترے چہرے کو چھو کر دیکھ سکتی ہوں

جو اک خاموش صحرا کی طرح معلوم ہوتی ہیں

میں ان آنکھوں میں پوشیدہ سمندر دیکھ سکتی ہوں

جدا ہوتے ہوئے وہ اپنی آنکھیں دے گیا مجھ کو

کہ اب میں خود کو آئینہ ہٹا کر دیکھ سکتی ہوں

بھرم اپنے سفر کا ہم سفر کوئی نہ رکھ پایا

ترے ہمراہ بھی کچھ دور چل کر دیکھ سکتی ہوں