jo peD sab ko kaDi dhup se bachata hai

jo peḌ sab ko kaḌī dhuup se bachātā hai

vo sardiyoñ meñ alāvoñ ke kaam aatā hai

yahāñ fareb ke kāñToñ kī ug rahī hai fasl

tū e'tibār kī chādar kahāñ bichhātā hai

bharosa tujh pe karūñ bhī to kis tarah ai dost

tū baat baat pe ehsān jo ginātā hai

tū mere paas hai itnā bahut hai mere liye

tū mere saath nahīñ hai ye kyoñ batātā hai

mirā mizāj badal de mire ḳhudā ab to

jise bhī dekho vahī fā.eda uThātā hai

maiñ jiit kar bhī kahāñ us se jiit paatā huuñ

vo haar kar bhī kahāñ mujh se haar paatā hai

vo rāhzan hai magar phir bhī jaane kyoñ ai 'nāz'

koī koī to use rāhbar batātā hai

jo peD sab ko kaDi dhup se bachata hai

wo sardiyon mein alawon ke kaam aata hai

yahan fareb ke kanTon ki ug rahi hai fasl

tu e'tibar ki chadar kahan bichhata hai

bharosa tujh pe karun bhi to kis tarah ai dost

tu baat baat pe ehsan jo ginata hai

tu mere pas hai itna bahut hai mere liye

tu mere sath nahin hai ye kyon batata hai

mera mizaj badal de mere KHuda ab to

jise bhi dekho wahi faeda uThata hai

main jit kar bhi kahan us se jit pata hun

wo haar kar bhi kahan mujh se haar pata hai

wo rahzan hai magar phir bhi jaane kyon ai 'naz'

koi koi to use rahbar batata hai