jo puchhte hain ki ye ishq-o-ashiqi kya hai

jo pūchhte haiñ ki ye ishq-o-āshiqī kyā hai

vo jānte nahīñ maqsūd-e-zindagī kyā hai

zamīr-e-pāk ḳhayāl-e-buland zauq-e-latīf

bas aur is ke sivā jauhar-e-ḳhudī kyā hai

vafā kī aaḌ meñ kyā kyā huī jafā ham par

jo dostī yahī Thahrī to dushmanī kyā hai

bajā hai fart-e-junūñ ne hameñ kiyā rusvā

jamāl-e-yār meñ āḳhir ye dilkashī kyā hai

vufūr-e-shauq kī māyūsiyāñ are tauba

dil-e-tabāh meñ ab aarzū rahī kyā hai

agar na jurm-e-mohabbat kī ye sazā hotī

to baat baat pe ham se ye be-ruḳhī kyā hai

na samjho tum mirī arz-e-niyāz ko shikva

maiñ jāntā huuñ taqāzā-e-bandagī kyā hai

atā kiyā thā jo zauq-e-numūd us dil ko

to har qadam pe ye rañg-e-shikastagī kyā hai

gurez kyā maiñ karūñ nāseho kī sohbat se

jahāñ na kuchh ho ye sohbat vahāñ burī kyā hai

vafā se aur na tark-e-vafā se aap haiñ ḳhush

mujhe batā.iye phir aap kī ḳhushī kyā hai

fareb-e-hastī-e-mauhūm khā rahā huuñ hanūz

mujhe ḳhabar hai haqīqat yahāñ mirī kyā hai

jo gāmzan haiñ sar-e-jāda-e-talab 'najmī'

vo jānte nahīñ duniyā meñ bebasī kyā hai

jo puchhte hain ki ye ishq-o-ashiqi kya hai

wo jaante nahin maqsud-e-zindagi kya hai

zamir-e-pak KHayal-e-buland zauq-e-latif

bas aur is ke siwa jauhar-e-KHudi kya hai

wafa ki aaD mein kya kya hui jafa hum par

jo dosti yahi Thahri to dushmani kya hai

baja hai fart-e-junun ne hamein kiya ruswa

jamal-e-yar mein aaKHir ye dilkashi kya hai

wufur-e-shauq ki mayusiyan are tauba

dil-e-tabah mein ab aarzu rahi kya hai

agar na jurm-e-mohabbat ki ye saza hoti

to baat baat pe hum se ye be-ruKHi kya hai

na samjho tum meri arz-e-niyaz ko shikwa

main jaanta hun taqaza-e-bandagi kya hai

ata kiya tha jo zauq-e-numud us dil ko

to har qadam pe ye rang-e-shikastagi kya hai

gurez kya main karun naseho ki sohbat se

jahan na kuchh ho ye sohbat wahan buri kya hai

wafa se aur na tark-e-wafa se aap hain KHush

mujhe bataiye phir aap ki KHushi kya hai

fareb-e-hasti-e-mauhum kha raha hun hanuz

mujhe KHabar hai haqiqat yahan meri kya hai

jo gamzan hain sar-e-jada-e-talab 'najmi'

wo jaante nahin duniya mein bebasi kya hai