jo qissa-go ne sunaya wahi suna gaya hai

jo qissa-go ne sunāyā vahī sunā gayā hai

agar thā is se sivā to nahīñ kahā gayā hai

musāfirat kā hunar hai na vāpsī kī ḳhabar

so chal rahā huuñ jidhar bhī ye rāstā gayā hai

amaañ ko niil mayassar na maiñ koī muusā

mujhe supurd-e-farā.īn kar diyā gayā hai

sabab nahīñ thā zamīñ par utārne kā mujhe

sabab baġhair hī vāpas uThā liyā gayā hai

ye muntahā hai mirī nā-rasā.ī kā shāyad

jo duur hadd-e-nazar se pare ḳhalā gayā hai

mahak uThe haiñ mire baaġh ke ḳhas-o-ḳhāshāk

koī Tahaltā huā sūrat-e-sabā gayā hai

jo qissa-go ne sunaya wahi suna gaya hai

agar tha is se siwa to nahin kaha gaya hai

musafirat ka hunar hai na wapsi ki KHabar

so chal raha hun jidhar bhi ye rasta gaya hai

aman ko nil mayassar na main koi musa

mujhe supurd-e-farain kar diya gaya hai

sabab nahin tha zamin par utarne ka mujhe

sabab baghair hi wapas uTha liya gaya hai

ye muntaha hai meri na-rasai ka shayad

jo dur hadd-e-nazar se pare KHala gaya hai

mahak uThe hain mere bagh ke KHas-o-KHashak

koi Tahalta hua surat-e-saba gaya hai