jo qurbaton ke nashe the wo ab utarne lage

jo qurbatoñ ke nashe the vo ab utarne lage

havā chalī hai to jhoñke udaas karne lage

ga.ī rutoñ kā ta.alluq bhī jān-levā thā

bahut se phuul na.e mausamoñ meñ marne lage

vo muddatoñ kī judā.ī ke baad ham se milā

to is tarah se ki ab ham gurez karne lage

ġhazal meñ jaise tire ḳhadd-o-ḳhāl bol uTheñ

ki jis tarah tirī tasvīr baat karne lage

bahut dinoñ se vo gambhīr ḳhāmushī hai 'farāz'

ki log apne ḳhayāloñ se aap Darne lage

jo qurbaton ke nashe the wo ab utarne lage

hawa chali hai to jhonke udas karne lage

gai ruton ka talluq bhi jaan-lewa tha

bahut se phul nae mausamon mein marne lage

wo muddaton ki judai ke baad hum se mila

to is tarah se ki ab hum gurez karne lage

ghazal mein jaise tere KHadd-o-KHal bol uThen

ki jis tarah teri taswir baat karne lage

bahut dinon se wo gambhir KHamushi hai 'faraaz'

ki log apne KHayalon se aap Darne lage