jo rishton ki ajab si zimmedari sar pe rakkhi hai

jo rishtoñ kī ajab sī zimmedārī sar pe rakkhī hai

to ab dastār jaisī chiiz bhī Thokar pe rakkhī hai

tirī yādoñ kī paa.el sī khanaktī hai mire ghar meñ

mire kamre ke andar gūñjtī hai dar pe rakkhī hai

tumhāre jism ne pahlū-ba-pahlū jis ko likkhā thā

vo silvaT jyuuñ kī tyuuñ ab bhī mire bistar pe rakkhī hai

tumhāre lams kī ḳhushbū abhī tak saath hai mere

mire takiye ke nīche hai mire bistar pe rakkhī hai

kahāñ kī be-qarārī bekalī aur kaisī bechainī

hathelī aap kī jab is dil-e-muztar pe rakkhī hai

ab is āshuftagī meñ kyā batā.eñ silsila apnā

kabhī jo ḳhāndānī thī sharāfat ghar pe rakkhī hai

kabhī ham us ko dil kā bojh samjhe haiñ na samjheñge

jo gaThrī zimmedārī kī hamāre sar pe rakkhī hai

jo rishton ki ajab si zimmedari sar pe rakkhi hai

to ab dastar jaisi chiz bhi Thokar pe rakkhi hai

teri yaadon ki pael si khanakti hai mere ghar mein

mere kamre ke andar gunjti hai dar pe rakkhi hai

tumhaare jism ne pahlu-ba-pahlu jis ko likkha tha

wo silwaT jyun ki tyun ab bhi mere bistar pe rakkhi hai

tumhaare lams ki KHushbu abhi tak sath hai mere

mere takiye ke niche hai mere bistar pe rakkhi hai

kahan ki be-qarari bekali aur kaisi bechaini

hatheli aap ki jab is dil-e-muztar pe rakkhi hai

ab is aashuftagi mein kya bataen silsila apna

kabhi jo KHandani thi sharafat ghar pe rakkhi hai

kabhi hum us ko dil ka bojh samjhe hain na samjhenge

jo gaThri zimmedari ki hamare sar pe rakkhi hai