jo sach hi bechna paDe to mol-bhao kya karen

jo sach hī bechnā paḌe to mol-bhāo kyā kareñ

haiñ aks aks aa.ine to rakh-rakhāv kyā kareñ

haiñ shahr bhar meñ shādiyāñ har ek shaḳhs shādmāñ

kisī ke sāmne ham apne dil ke ghaav kyā kareñ

thī mutma.in nigāh bhī ke bah chukā hai sail-e-ġham

huā magar jo sahn-e-dil meñ jal-bhrāv kyā kareñ

ye kis ke ġham kī aañch se sulag rahā hai āsmāñ

bujhegā kis tarah zamīñ kā ye alaav kyā kareñ

jo titliyāñ nahīñ dikhā.ī deñ to fikr ho ga.ī

bahār kā chaman se ab hai chal-chalāv kyā kareñ

nadī meñ aa.ī baaḌh ko ḳhabar samajh rahe the ham

hamāre ghar kī samt bhī hai ab bahāv kyā kareñ

banā ke bhāñp dhuup ye uḌā na de hameñ kahīñ

hai jaan sard chhāñv kā kahāñ paḌāv kyā kareñ

hameñ zamīñ aziiz thī tumheñ falak kī aarzū

rah-e-hayāt kā ajiib thā ghumāv kyā kareñ

jo kal hameñ bachā.e thī samundaroñ ke darmiyāñ

'hinā' hai aaj Dūbne ko ḳhud vo naav kyā kareñ

jo sach hi bechna paDe to mol-bhao kya karen

hain aks aks aaine to rakh-rakhaw kya karen

hain shahr bhar mein shadiyan har ek shaKHs shadman

kisi ke samne hum apne dil ke ghaw kya karen

thi mutmain nigah bhi ke bah chuka hai sail-e-gham

hua magar jo sahn-e-dil mein jal-bhraw kya karen

ye kis ke gham ki aanch se sulag raha hai aasman

bujhega kis tarah zamin ka ye alaw kya karen

jo titliyan nahin dikhai den to fikr ho gai

bahaar ka chaman se ab hai chal-chalaw kya karen

nadi mein aai baDh ko KHabar samajh rahe the hum

hamare ghar ki samt bhi hai ab bahaw kya karen

bana ke bhanp dhup ye uDa na de hamein kahin

hai jaan sard chhanw ka kahan paDaw kya karen

hamein zamin aziz thi tumhein falak ki aarzu

rah-e-hayat ka ajib tha ghumaw kya karen

jo kal hamein bachae thi samundaron ke darmiyan

'hina' hai aaj Dubne ko KHud wo naw kya karen