jo saKHt-tar hai wo mushkil abhi nahin aai

jo saḳht-tar hai vo mushkil abhī nahīñ aa.ī

baḌho ki sarhad-e-manzil abhī nahīñ aa.ī

hayāt DhūñDegī jā-e-amāñ na pā.egī

vo āzmā.ish-e-qātil abhī nahīñ aa.ī

sin-e-bulūġh ko pahuñchā nahīñ junūñ shāyad

ki qaid-e-tauq-o-salāsil abhī nahīñ aa.ī

na jaane hoñge yahāñ qatl kitne haq vaale

samajh meñ sāzish-e-bātil abhī nahīñ aa.ī

ḳhudā kā shukr hai baaqī hai raushnī kī tamīz

ki sub.h shaam ke qābil abhī nahīñ aa.ī

kisī kī yaad meñ jalnā mujhe nahīñ aatā

ki ruḳh pe raushnī-e-dil abhī nahīñ aa.ī

paḌāv Daal na 'aḳhtar' rahe safar jaarī

fasīl-e-shām muqābil abhī nahīñ aa.ī

jo saKHt-tar hai wo mushkil abhi nahin aai

baDho ki sarhad-e-manzil abhi nahin aai

hayat DhunDegi ja-e-aman na paegi

wo aazmaish-e-qatil abhi nahin aai

sin-e-bulugh ko pahuncha nahin junun shayad

ki qaid-e-tauq-o-salasil abhi nahin aai

na jaane honge yahan qatl kitne haq wale

samajh mein sazish-e-baatil abhi nahin aai

KHuda ka shukr hai baqi hai raushni ki tamiz

ki subh sham ke qabil abhi nahin aai

kisi ki yaad mein jalna mujhe nahin aata

ki ruKH pe raushni-e-dil abhi nahin aai

paDaw Dal na 'aKHtar' rahe safar jari

fasil-e-sham muqabil abhi nahin aai