jo sakun na ras aaya to main gham mein Dhal raha hun

jo sakūñ na raas aayā to maiñ ġham meñ Dhal rahā huuñ

ġham-e-zindagī se kah do ki maiñ ruḳh badal rahā huuñ

maiñ banā huuñ ashk-e-ġham ḳhud tumheñ kyuuñ maiñ khal rahā huuñ

ye nikālo merā qissa ki maiñ ḳhud nikal rahā huuñ

tirī bazm-e-ḳhud-ġharaz ne ka.ī rañg badle lekin

maiñ harīf-e-sham.a ban kar usī tarah jal rahā huuñ

yūñhī Tālte rahe tum mirī ḳhvāhishoñ ko lekin

magar ab zarā sambhaltā maiñ bahut machal rahā huuñ

rah-e-shauq meñ unheñ bhī lagī mere saath Thokar

vo sambhal chuke haiñ lekin maiñ abhī sambhal rahā huuñ

vahī azm-e-mustaqil hai rah-e-zindagī meñ 'aḳhtar'

na ġham-e-shikasta-pā.ī na maiñ haath mal rahā huuñ

jo sakun na ras aaya to main gham mein Dhal raha hun

gham-e-zindagi se kah do ki main ruKH badal raha hun

main bana hun ashk-e-gham KHud tumhein kyun main khal raha hun

ye nikalo mera qissa ki main KHud nikal raha hun

teri bazm-e-KHud-gharaz ne kai rang badle lekin

main harif-e-shama ban kar usi tarah jal raha hun

yunhi Talte rahe tum meri KHwahishon ko lekin

magar ab zara sambhalta main bahut machal raha hun

rah-e-shauq mein unhen bhi lagi mere sath Thokar

wo sambhal chuke hain lekin main abhi sambhal raha hun

wahi azm-e-mustaqil hai rah-e-zindagi mein 'aKHtar'

na gham-e-shikasta-pai na main hath mal raha hun