jo shab bhar aansuon se tar rahega

jo shab bhar āñ.suoñ se tar rahegā

sahar dam dāman-e-dil bhar rahegā

ilaaj us kā guzar jaanā hai jaañ se

guzar jaane kā jaañ se Dar rahegā

huā mushkil tire āshiq kā jiinā

tire kūche meñ aa kar mar rahegā

dil-e-vahshī ne kab ārām paayā

sitam kī aag meñ jal kar rahegā

hayāt-e-jāvedāñ ho yā ki duniyā

tirā banda tire dar par rahegā

na ho isyāñ to kaisā hashr kā din

kahāñ phir dāvar-e-mahshar rahegā

haqā.eq se jo dil uljhā huā hai

vahī ḳhvāboñ kā sūrat-gar rahegā

koī to ḳhair kā pahlū bhī nikle

akelā kis tarah ye shar rahegā

na bazm-e-mai-kada baaqī rahegī

na dast-e-shauq meñ sāġhar rahegā

jo din hai aane vaalā be-amāñ hai

qadam ghar se agar bāhar rahegā

koī to āzmī-sāhib ko samjhāo

ye gosha shahr se behtar rahegā

jo shab bhar aansuon se tar rahega

sahar dam daman-e-dil bhar rahega

ilaj us ka guzar jaana hai jaan se

guzar jaane ka jaan se Dar rahega

hua mushkil tere aashiq ka jina

tere kuche mein aa kar mar rahega

dil-e-wahshi ne kab aaram paya

sitam ki aag mein jal kar rahega

hayat-e-jawedan ho ya ki duniya

tera banda tere dar par rahega

na ho isyan to kaisa hashr ka din

kahan phir dawar-e-mahshar rahega

haqaeq se jo dil uljha hua hai

wahi KHwabon ka surat-gar rahega

koi to KHair ka pahlu bhi nikle

akela kis tarah ye shar rahega

na bazm-e-mai-kada baqi rahegi

na dast-e-shauq mein saghar rahega

jo din hai aane wala be-aman hai

qadam ghar se agar bahar rahega

koi to aazmi-sahib ko samjhao

ye gosha shahr se behtar rahega