jo shajar sukh gaya hai wo hara kaise ho

jo shajar suukh gayā hai vo harā kaise ho

maiñ payambar to nahīñ merā kahā kaise ho

dil ke har zarre pe hai naqsh mohabbat us kī

nuur āñkhoñ kā hai āñkhoñ se judā kaise ho

jis ko jaanā hī nahīñ us ko ḳhudā kyuuñ māneñ

aur jise jaan chuke haiñ vo ḳhudā kaise ho

umr saarī to añdhere meñ nahīñ kaT saktī

ham agar dil na jalā.eñ to ziyā kaise ho

jis se do roz bhī khul kar na mulāqāt huī

muddatoñ ba.ad mile bhī to gilā kaise ho

duur se dekh ke maiñ ne use pahchān liyā

us ne itnā bhī nahīñ mujh se kahā kaise ho

vo bhī ik daur thā jab maiñ ne tujhe chāhā thā

dil kā darvāza hai har vaqt khulā kaise ho

jab koī dād-e-vafā chāhne vaalā na rahā

kaun insāf kare hashr bapā kaise ho

aa.ine meñ bhī nazar aatī hai sūrat terī

koī maqsūd-e-nazar tere sivā kaise ho

kin nigāhoñ se use dekh rahā huuñ 'shahzād'

mujh ko ma.alūm nahīñ us ko patā kaise ho

jo shajar sukh gaya hai wo hara kaise ho

main payambar to nahin mera kaha kaise ho

dil ke har zarre pe hai naqsh mohabbat us ki

nur aankhon ka hai aankhon se juda kaise ho

jis ko jaana hi nahin us ko KHuda kyun manen

aur jise jaan chuke hain wo KHuda kaise ho

umr sari to andhere mein nahin kaT sakti

hum agar dil na jalaen to ziya kaise ho

jis se do roz bhi khul kar na mulaqat hui

muddaton baad mile bhi to gila kaise ho

dur se dekh ke main ne use pahchan liya

us ne itna bhi nahin mujh se kaha kaise ho

wo bhi ek daur tha jab main ne tujhe chaha tha

dil ka darwaza hai har waqt khula kaise ho

jab koi dad-e-wafa chahne wala na raha

kaun insaf kare hashr bapa kaise ho

aaine mein bhi nazar aati hai surat teri

koi maqsud-e-nazar tere siwa kaise ho

kin nigahon se use dekh raha hun 'shahzad'

mujh ko malum nahin us ko pata kaise ho