jo shaKHs sare zamane ka ranj sahta tha

jo shaḳhs saare zamāne kā rañj sahtā thā

vo aaj raah meñ misl-e-ġhubār baiThā thā

yuuñ but banā vo khaḌā thā ki kyā batā.ūñ tumheñ

maiñ us ko chhūne se pahle ḳhayāl samjhā thā

maiñ so rahā thā ki vo ḳhvāb mujh pe TuuT paḌā

maiñ kaise bach ke nikaltā ki maiñ to andhā thā

hazār naam the jo lauh-e-dil pe likkhe the

magar vo naam ki jaise charāġh jaltā thā

baras rahā thā qayāmat kā abr sar pe mire

magar ye baat ajab thī maiñ phir bhī pyāsā thā

na us ne mujh se kahā thā ki Thahro ruk jaao

na sañg-e-surḳh ko maiñ ne palaT ke dekhā thā

balā-e-shahr mujhe DhūñDhtī thī galiyoñ meñ

maiñ apne-āp ko ghar meñ chhupā.e baiThā thā

havā-e-sarv ne patthar chalā.e the kyā kyā

harā-bharā vo shajar ek pal meñ nañgā thā

sabhī se miltā hai lekin vo ab kisī kā nahīñ

'azīm' tum ne bhī dekhā ki vo tumhārā thā

jo shaKHs sare zamane ka ranj sahta tha

wo aaj rah mein misl-e-ghubar baiTha tha

yun but bana wo khaDa tha ki kya bataun tumhein

main us ko chhune se pahle KHayal samjha tha

main so raha tha ki wo KHwab mujh pe TuT paDa

main kaise bach ke nikalta ki main to andha tha

hazar nam the jo lauh-e-dil pe likkhe the

magar wo nam ki jaise charagh jalta tha

baras raha tha qayamat ka abr sar pe mere

magar ye baat ajab thi main phir bhi pyasa tha

na us ne mujh se kaha tha ki Thahro ruk jao

na sang-e-surKH ko main ne palaT ke dekha tha

bala-e-shahr mujhe DhunDhti thi galiyon mein

main apne-ap ko ghar mein chhupae baiTha tha

hawa-e-sarw ne patthar chalae the kya kya

hara-bhara wo shajar ek pal mein nanga tha

sabhi se milta hai lekin wo ab kisi ka nahin

'azim' tum ne bhi dekha ki wo tumhaara tha