jo shaKHs sarbuland tha meri nigah mein

jo shaḳhs sarbuland thā merī nigāh meñ

dekhā to hai khaḌā vo saf-e-rū-siyāh meñ

rangīn kā.enāt-o-dil-o-jāñ kī chaah meñ

ham kar rahe haiñ roz izāfa gunāh meñ

sab kuchh luTā ke us kī hifāzat kiyā karo

jo shaḳhs aa gayā ho tumhārī panāh meñ

bahrūpiyoñ kī fauj bharī hai galī galī

ḳhādim dar-asl diin ke haiñ ḳhānqāh meñ

mā'sūm bastiyoñ ko jalāne se roktā

vo mard-e-haq-shanās kahāñ thā sipāh meñ

hargiz kisī ġharīb pe zulm-o-sitam na kar

tāsīr be-panāh hai muflis kī aah meñ

mere ḳhilāf zahr ugaltā thā is liye

sach bolne kī taab nahīñ thī gavāh meñ

lete raho 'azīz-o-aqārib kā jā.eza

'betāb' luT na jaao kahīñ rasm-o-rāh meñ

jo shaKHs sarbuland tha meri nigah mein

dekha to hai khaDa wo saf-e-ru-siyah mein

rangin kaenat-o-dil-o-jaan ki chah mein

hum kar rahe hain roz izafa gunah mein

sab kuchh luTa ke us ki hifazat kiya karo

jo shaKHs aa gaya ho tumhaari panah mein

bahrupiyon ki fauj bhari hai gali gali

KHadim dar-asl din ke hain KHanqah mein

ma'sum bastiyon ko jalane se rokta

wo mard-e-haq-shanas kahan tha sipah mein

hargiz kisi gharib pe zulm-o-sitam na kar

tasir be-panah hai muflis ki aah mein

mere KHilaf zahr ugalta tha is liye

sach bolne ki tab nahin thi gawah mein

lete raho 'aziz-o-aqarib ka jaeza

'betab' luT na jao kahin rasm-o-rah mein