jo sochta hun agar wo hawa se kah jaun

jo sochtā huuñ agar vo havā se kah jā.ūñ

havā kī lauh pe mahfūz ho ke rah jā.ūñ

ye kyā yaqīn ki tū mil hī jā.egā mujh ko

tirī judā.ī kā jaañ levā dik to sah jā.ūñ

ḳhud apne aap ko dekhūñ varaq varaq kar ke

kisī ke sāmne jā.ūñ to tah-ba-tah jā.ūñ

khaḌā huuñ sūrat-e-dīvār reg-e-sāhil par

zarā sī mauj bhī aa.e to ghul ke bah jā.ūñ

mire ḳhudā mujhe iz.hār kī vo qudrat de

mujhe jo kahnā hai ik lafz meñ hī kah jā.ūñ

harīf-e-koshish-e-parvāz hai ye mausam-e-barf

maiñ āshiyāñ meñ hī par khol khol rah jā.ūñ

chaTān ban ke bhī kab tak bachā rahūñgā 'riyāz'

misāl-e-ḳhas abhī sail-e-zamāñ meñ bah jā.ūñ

jo sochta hun agar wo hawa se kah jaun

hawa ki lauh pe mahfuz ho ke rah jaun

ye kya yaqin ki tu mil hi jaega mujh ko

teri judai ka jaan lewa dik to sah jaun

KHud apne aap ko dekhun waraq waraq kar ke

kisi ke samne jaun to tah-ba-tah jaun

khaDa hun surat-e-diwar reg-e-sahil par

zara si mauj bhi aae to ghul ke bah jaun

mere KHuda mujhe izhaar ki wo qudrat de

mujhe jo kahna hai ek lafz mein hi kah jaun

harif-e-koshish-e-parwaz hai ye mausam-e-barf

main aashiyan mein hi par khol khol rah jaun

chaTan ban ke bhi kab tak bacha rahunga 'riyaz'

misal-e-KHas abhi sail-e-zaman mein bah jaun