jo soz-e-mohabbat mein jalte rahe

jo soz-e-mohabbat meñ jalte rahe

añdheroñ kī qismat badalte rahe

dil-o-jān kartā thā jin par nisār

mire naam se kyoñ vo jalte rahe

unhī ko mile manziloñ ke nishāñ

jo har gaam gir kar sañbhalte rahe

ḳhudā ne diye the jinheñ hausle

havāoñ ke ruḳh vo badalte rahe

hue manziloñ se shanāsā vo hī

mirī rahbarī meñ jo chalte rahe

rahā mujh pe ye bhī ḳhudā kā karam

mire sar se tūfān Talte rahe

maiñ manzil pe apnī pahuñch bhī gayā

jo hāsid the haath apne malte rahe

buzurgoñ ke naqsh-e-qadam jis pe the

usī rah pe 'rizvān' chalte rahe

jo soz-e-mohabbat mein jalte rahe

andheron ki qismat badalte rahe

dil-o-jaan karta tha jin par nisar

mere nam se kyon wo jalte rahe

unhi ko mile manzilon ke nishan

jo har gam gir kar sanbhalte rahe

KHuda ne diye the jinhen hausle

hawaon ke ruKH wo badalte rahe

hue manzilon se shanasa wo hi

meri rahbari mein jo chalte rahe

raha mujh pe ye bhi KHuda ka karam

mere sar se tufan Talte rahe

main manzil pe apni pahunch bhi gaya

jo hasid the hath apne malte rahe

buzurgon ke naqsh-e-qadam jis pe the

usi rah pe 'rizwan' chalte rahe