جو سولی کے مقدر میں رکھے تھے

جو سولی کے مقدر میں رکھے تھے

ہم ایسے بد نصیبوں کے گلے تھے

ہمارا وقت پورا ہو رہا تھا

کسی کے منہ پہ بارہ بج رہے تھے

اذیت لطف دینے لگ گئی تھی

سو ناخن سے کلائی کاٹتے تھے

محبت مجھ کو کافر کر رہی ہے

مرے دونوں فرشتوں کے گلے تھے

زمیں سونا اگلنے لگ پڑی تھی

مرے ہاتھوں کے چھالے بڑھ رہے تھے

شہنشہ جب ستم ڈھانے پہ آیا

خدا چپ تھا مگر ہم تو لڑے تھے

کوئی سندر پجارن مر گئی تھی

تبھی تو دیوتا روئے ہوئے تھے

کوئی تختی نہیں تھی شہر بھر میں

کہ چوراہوں پہ بس مردے گڑے تھے