jo tere dard hain wahi sab mere dard hain

jo tere dard haiñ vahī sab mere dard haiñ

kahne ko apnī apnī jagah fard fard haiñ

dhuñdlā ga.e haiñ aks nazar hai bhañvar bhañvar

ḳhvāboñ meñ bhī ḳhayāl ke ā.īne gard haiñ

peshāniyoñ pe vaqt shikan-dar-shikan nahīñ

chehra-ba-chehra likhe hue dil ke dard haiñ

ik dūsre ko jaan ke pahchānte nahīñ

ham log saare ek qabīle ke fard haiñ

bhīgī hatheliyoñ se na paḌh kal kī zindagī

gahrī har ik lakīr sahī haath sard haiñ

ye ḳhushk lab ye paañv ke chhāle ye sar kī dhuul

ham shahr kī fazā meñ bhī sahrā-navard haiñ

'iqbāl' jab se phuul haiñ gul-dān ke asiir

ḳhushbū uḌī uḌī sī hai aur rang zard haiñ

jo tere dard hain wahi sab mere dard hain

kahne ko apni apni jagah fard fard hain

dhundla gae hain aks nazar hai bhanwar bhanwar

KHwabon mein bhi KHayal ke aaine gard hain

peshaniyon pe waqt shikan-dar-shikan nahin

chehra-ba-chehra likhe hue dil ke dard hain

ek dusre ko jaan ke pahchante nahin

hum log sare ek qabile ke fard hain

bhigi hatheliyon se na paDh kal ki zindagi

gahri har ek lakir sahi hath sard hain

ye KHushk lab ye panw ke chhaale ye sar ki dhul

hum shahr ki faza mein bhi sahra-naward hain

'iqbaal' jab se phul hain gul-dan ke asir

KHushbu uDi uDi si hai aur rang zard hain