jo tere naqsh-e-kaf-e-pa pe chal gae hote

jo tere naqsh-e-kaf-e-pā pe chal ga.e hote

to mehr-o-māh se aage nikal ga.e hote

tumhārā naam laboñ par jo aa gayā hotā

to girne vaale yaqīnan sañbhal ga.e hote

ham apne josh-e-junūñ ko jo zabt kar jaate

to hādsāt ke tevar badal ga.e hote

samajh sakā na koī azmat-e-vafā varna

hamāre ḳhvāb haqīqat meñ Dhal ga.e hote

hamārī tishna-labī maslahat samajh varna

hamāre vāste shīshe pighal ga.e hote

chaman ko ḳhūn-e-jigar kaun baḳhshtā 'nādim'

jo ham bhī jānib-e-sahrā nikal ga.e hote

jo tere naqsh-e-kaf-e-pa pe chal gae hote

to mehr-o-mah se aage nikal gae hote

tumhaara nam labon par jo aa gaya hota

to girne wale yaqinan sanbhal gae hote

hum apne josh-e-junun ko jo zabt kar jate

to hadsat ke tewar badal gae hote

samajh saka na koi azmat-e-wafa warna

hamare KHwab haqiqat mein Dhal gae hote

hamari tishna-labi maslahat samajh warna

hamare waste shishe pighal gae hote

chaman ko KHun-e-jigar kaun baKHshta 'nadim'

jo hum bhi jaanib-e-sahra nikal gae hote