jo tere sath zara der tak ruka hota

jo tere saath zarā der tak rukā hotā

maiñ ik ḳhayāl se aage nahīñ gayā hotā

faqīr log rahe apne apne haal meñ mast

nahīñ to shahr kā naqsha badal chukā hotā

maiñ apne dil se muḳhātib thā tājiroñ se nahīñ

ki naap tol ke sab kuchh kahā sunā hotā

vo bādshāh-e-mohabbat meñ haar bhī jaate

to saltanat kā baḌā kaam ho gayā hotā

koī to jaag gayā hotā baaġh jalne tak

mirī sadā se kisī kā bhalā huā hotā

ham aise log to uktā ga.e the 'ishq se bhī

vo bevafā nahīñ hotā to jaane kyā hotā

bhalā huā ki judā ho gayā vo jādūgar

maiñ band āñkheñ liye saath chal rahā hotā

jo tere sath zara der tak ruka hota

main ek KHayal se aage nahin gaya hota

faqir log rahe apne apne haal mein mast

nahin to shahr ka naqsha badal chuka hota

main apne dil se muKHatib tha tajiron se nahin

ki nap tol ke sab kuchh kaha suna hota

wo baadshah-e-mohabbat mein haar bhi jate

to saltanat ka baDa kaam ho gaya hota

koi to jag gaya hota bagh jalne tak

meri sada se kisi ka bhala hua hota

hum aise log to ukta gae the 'ishq se bhi

wo bewafa nahin hota to jaane kya hota

bhala hua ki juda ho gaya wo jadugar

main band aankhen liye sath chal raha hota