جو تیری افشاں سنواریں زندگی اے زندگی

جو تیری افشاں سنواریں زندگی اے زندگی

روز و شب ایسے گزاریں زندگی اے زندگی

بڑھ گیا دریا کا پانی کف اڑاتا موج موج

اڑ گئیں کونجوں کی ڈاریں زندگی اے زندگی

ہر طرف چھایا ہوا ہے اک سکوت بے کراں

پھر بھی ہم تجھ کو پکاریں زندگی اے زندگی

تیری صورت پر گمان دشت و صحرا ہائے ہائے

تیرے قدموں میں بہاریں زندگی اے زندگی

سر اٹھائیں دار پر یادیں سر مقتل صدا

نقش تیرے ہی ابھاریں زندگی اے زندگی

جن کے ہونٹوں پر سدا رہتے ہیں تیرے زمزمے

ان کے سینوں میں کٹاریں زندگی اے زندگی

شہر ہے آخر یہ کوئی سرد ویرانہ نہیں

جینے والے دم نہ ماریں زندگی اے زندگی

دیں جو تجھ کو فرصت یک دو نفس کی تہمتیں

ان سے بھی ہم لوگ ہاریں زندگی اے زندگی

دور تک ملتا نہ ہو نام و نشاں تیرا جہاں

ہم وہاں دامن پساریں زندگی اے زندگی