jo teri chah mein KHana-KHarab hota hai

jo terī chaah meñ ḳhāna-ḳharāb hotā hai

jahān-e-ishq meñ vo kāmyāb hotā hai

vo ḳhush-nasīb hai jis par itaab hotā hai

tirī nazar meñ vahī intiḳhāb hotā hai

adā-e-farz meñ jo kāmyāb hotā hai

tire huzūr meñ vo bāzyāb hotā hai

zamīñ ne is liye sūraj ko sar chaḌhāyā hai

ki is se saarā jahāñ faizyāb hotā hai

ḳhayāl-e-ḳhidmat-e-ḳhalq-e-ḳhudā jo rakhte haiñ

karam ḳhudā kā unheñ dastiyāb hotā hai

ye dars dil ne diyā hai mujhe yaqīñ maano

kisī ke dil ko dukhānā azaab hotā hai

haqīr jis ko samajhte ho ai jahāñ vaalo

yahāñ nahīñ vo vahāñ kāmyāb hotā hai

tamīz kuchh nahīñ dair-o-haram meñ vo karte

kushāda jin pe haqīqat kā baab hotā hai

savāl tujh se kare bhī to koī kis muñh se

javāb terā har ik lā-javāb hotā hai

jo jaan kartā hai apnī nisār-e-qaum-o-vatan

ufuq pe qaum kī vo āftāb hotā hai

gunāh karne se Dartā huuñ is liye 'sūfī'

gunāhgār kā āḳhir ḳharāb hotā hai

jo teri chah mein KHana-KHarab hota hai

jahan-e-ishq mein wo kaamyab hota hai

wo KHush-nasib hai jis par itab hota hai

teri nazar mein wahi intiKHab hota hai

ada-e-farz mein jo kaamyab hota hai

tere huzur mein wo bazyab hota hai

zamin ne is liye suraj ko sar chaDhaya hai

ki is se sara jahan faizyab hota hai

KHayal-e-KHidmat-e-KHalq-e-KHuda jo rakhte hain

karam KHuda ka unhen dastiyab hota hai

ye dars dil ne diya hai mujhe yaqin mano

kisi ke dil ko dukhana azab hota hai

haqir jis ko samajhte ho ai jahan walo

yahan nahin wo wahan kaamyab hota hai

tamiz kuchh nahin dair-o-haram mein wo karte

kushada jin pe haqiqat ka bab hota hai

sawal tujh se kare bhi to koi kis munh se

jawab tera har ek la-jawab hota hai

jo jaan karta hai apni nisar-e-qaum-o-watan

ufuq pe qaum ki wo aaftab hota hai

gunah karne se Darta hun is liye 'sufi'

gunahgar ka aaKHir KHarab hota hai