jo thi ilaqe mein sab se hasin bech aae

jo thī ilāqe meñ sab se hasīn bech aa.e

ham apne purkhoñ kī saarī zamīn bech aa.e

purāne logoñ ne gañjoñ ko kañghiyāñ bechīñ

na.e jo log haiñ sāñpoñ ko biin bech aa.e

bharam thā dil meñ jo mahfil kā vo bhī dil se gayā

suḳhan to biktā thā tum sāma.īn bech aa.e

nahīñ ye ġham ki amānat meñ kyuuñ ḳhayānat kī

mujhe ye dukh hai vo apnā yaqīn beach aa.e

jo log khāte haiñ urdu ke naam kī roTī

laboñ pe un ke hai bas siin shiin bech aa.e

pakaḌ lī zañg meñ lipTī hoī na.ī tahzīb

milā thā ham ko jo sone sā diin bech aa.e

jo thi ilaqe mein sab se hasin bech aae

hum apne purkhon ki sari zamin bech aae

purane logon ne ganjon ko kanghiyan bechin

nae jo log hain sanpon ko bin bech aae

bharam tha dil mein jo mahfil ka wo bhi dil se gaya

suKHan to bikta tha tum samain bech aae

nahin ye gham ki amanat mein kyun KHayanat ki

mujhe ye dukh hai wo apna yaqin beach aae

jo log khate hain urdu ke nam ki roTi

labon pe un ke hai bas sin shin bech aae

pakaD li zang mein lipTi hoi nai tahzib

mila tha hum ko jo sone sa din bech aae