jo teri shart pe bhaTTi se pighal kar nikle

jo tirī shart pe bhaTTī se pighal kar nikle

ham vo shā.ir haiñ jo ehsās meñ Dhal kar nikle

kitnā masrūr thā vo us ko nahīñ thā mālūm

ham kyoñ āvāz pe yuuñ hāthoñ ko mal kar nikle

ham vahī log haiñ jo sun ke sadā-e-hijrat

apne qadmoñ meñ safar apnā kuchal kar nikle

ye mire lafz mirī soch ke jauhar ye to

munjamid bahr-e-garāñ se ye ubal kar nikle

haal pūchhe na koī ham se ḳharāboñ kā jo bas

ghar se nikle to muqaddar ko badal kar nikle

aise insānoñ ko maiñ naam duuñ kyā tū hī batā

gulshan-e-dil se jo kaliyoñ ko masal kar nikle

thī kashish quvvat-e-qātil meñ bahut hī 'fahmī'

ham magar pairoñ tale us ko masal kar nikle

jo teri shart pe bhaTTi se pighal kar nikle

hum wo shair hain jo ehsas mein Dhal kar nikle

kitna masrur tha wo us ko nahin tha malum

hum kyon aawaz pe yun hathon ko mal kar nikle

hum wahi log hain jo sun ke sada-e-hijrat

apne qadmon mein safar apna kuchal kar nikle

ye mere lafz meri soch ke jauhar ye to

munjamid bahr-e-garan se ye ubal kar nikle

haal puchhe na koi hum se KHarabon ka jo bas

ghar se nikle to muqaddar ko badal kar nikle

aise insanon ko main nam dun kya tu hi bata

gulshan-e-dil se jo kaliyon ko masal kar nikle

thi kashish quwwat-e-qatil mein bahut hi 'fahmi'

hum magar pairon tale us ko masal kar nikle