jo tumne puchha to harf-e-ulfat bar aaya sahib hamare lab se

jo tum ne pūchhā to harf-e-ulfat bar aayā sāhib hamāre lab se

so is ko sun kar hue ḳhafā tum na kahte the ham isī sabab se

na dete ham to kabhī dil apnā na hote hargiz ḳharāb-o-rusvā

vale kareñ kyā ki tum ne ham ko dikhā.īñ jhumkīñ ajab hī chhab se

vo ja.ad-e-mushkīñ jo din ko dekhe to yaad us kī meñ shaam hī se

ye pech-o-tāb aa ke dil se uljhe ki phir sahar tak na suljhe shab se

lagā.ī funduq jo ham ne us kī kalā.ī pakḌī to hañs ke bolā

ye uñglī pahuñche kī yaañ na Thahrī bas aap rahiye zarā adab se

kahā thā ham kuchh kaheñge tum se kahā to aisā ki ham na samjhe

samajhte kyūñ-kar ki us ne lab se suḳhan nikālā kuchh aise Dhab se

havas to bose kī hai nihāyat pa kījiye kyā ki bas nahīñ hai

jo dastaras ho to misl-e-sāġhar lagāveñ lab ko ham un ke lab se

kisī ne pūchhā 'nazīr' ko bhī tumhārī mahfil meñ baar hogā

kahā ki hogā vo bolā kab se kahā kabhū kā kabhī, na ab se

jo tum ne puchha to harf-e-ulfat bar aaya sahib hamare lab se

so is ko sun kar hue KHafa tum na kahte the hum isi sabab se

na dete hum to kabhi dil apna na hote hargiz KHarab-o-ruswa

wale karen kya ki tum ne hum ko dikhain jhumkin ajab hi chhab se

wo jad-e-mushkin jo din ko dekhe to yaad us ki mein sham hi se

ye pech-o-tab aa ke dil se uljhe ki phir sahar tak na suljhe shab se

lagai funduq jo hum ne us ki kalai pakDi to hans ke bola

ye ungli pahunche ki yan na Thahri bas aap rahiye zara adab se

kaha tha hum kuchh kahenge tum se kaha to aisa ki hum na samjhe

samajhte kyun-kar ki us ne lab se suKHan nikala kuchh aise Dhab se

hawas to bose ki hai nihayat pa kijiye kya ki bas nahin hai

jo dastaras ho to misl-e-saghar lagawen lab ko hum un ke lab se

kisi ne puchha 'nazir' ko bhi tumhaari mahfil mein bar hoga

kaha ki hoga wo bola kab se kaha kabhu ka kabhi, na ab se