jo tum pe yunhi luTai maine ab uski qimat to chahiye na

jo tum pe yūñhī luTā.ī maiñ ne ab us kī qīmat to chāhiye nā

tumhārī nazroñ meñ hai mohabbat agar tijārat to chāhiye nā

jo mujh se milne kī ḳhvāhisheñ hoñ to ek lamha tavīl kar lo

masāfatoñ ko sameTnā hai zarā sī muddat to chāhiye nā

tumhāre lahje meñ tanz hai par suno kuchh is meñ maza nahīñ hai

tum is ko thoḌā sā talḳh kar lo zarā sī lazzat to chāhiye nā

maiñ chāhtā huuñ ki aks terā mirī nazar se bhī ho ke guzre

ye dil jo ḳhālī dhaḌak rahā hai ab is meñ hasrat to chāhiye nā

mujhe vo kuchh aise dekhtī hai ki jaise mujh ko bulā rahī ho

maiñ us kī jānib qadam baḌhā luuñ magar ijāzat to chāhiye nā

maiñ ashk saare sukhā ke apnī udāsiyāñ bhī tabāh kar luuñ

magar mujhe in tabāhiyoñ kī koī zamānat to chāhiye nā

jo tum pe yunhi luTai main ne ab us ki qimat to chahiye na

tumhaari nazron mein hai mohabbat agar tijarat to chahiye na

jo mujh se milne ki KHwahishen hon to ek lamha tawil kar lo

masafaton ko sameTna hai zara si muddat to chahiye na

tumhaare lahje mein tanz hai par suno kuchh is mein maza nahin hai

tum is ko thoDa sa talKH kar lo zara si lazzat to chahiye na

main chahta hun ki aks tera meri nazar se bhi ho ke guzre

ye dil jo KHali dhaDak raha hai ab is mein hasrat to chahiye na

mujhe wo kuchh aise dekhti hai ki jaise mujh ko bula rahi ho

main us ki jaanib qadam baDha lun magar ijazat to chahiye na

main ashk sare sukha ke apni udasiyan bhi tabah kar lun

magar mujhe in tabahiyon ki koi zamanat to chahiye na