jo tum se mila hoga jo tumne diya hoga

jo tum se milā hogā jo tum ne diyā hogā

vo ġham bhī masarrat ke sāñche meñ Dhalā hogā

ai ham-safaro us kā kyā haal huā hogā

manzil ke qarīb aa kar jo shaḳhs luTā hogā

ham rāh-e-mohabbat se is tarah se guzreñge

jo naqsh-e-qadam hogā tasvīr-e-vafā hogā

ham to tumheñ hastī kā muḳhtār samajhte haiñ

jo tum ne kahā hogā achchhā hī kahā hogā

ab yuuñ hī taḌapne do mujh ko mire ġhamḳhvāro

taskīn agar doge dard aur sivā hogā

maujoñ kī ravānī se mahsūs ye hotā hai

dīvāna koī 'ġhāzī' tūfāñ se laḌā hogā

jo tum se mila hoga jo tum ne diya hoga

wo gham bhi masarrat ke sanche mein Dhala hoga

ai ham-safaro us ka kya haal hua hoga

manzil ke qarib aa kar jo shaKHs luTa hoga

hum rah-e-mohabbat se is tarah se guzrenge

jo naqsh-e-qadam hoga taswir-e-wafa hoga

hum to tumhein hasti ka muKHtar samajhte hain

jo tum ne kaha hoga achchha hi kaha hoga

ab yun hi taDapne do mujh ko mere ghamKHwaro

taskin agar doge dard aur siwa hoga

maujon ki rawani se mahsus ye hota hai

diwana koi 'ghazi' tufan se laDa hoga