jo ulfat ki bina par jhonpDi hai

jo ulfat kī binā par jhoñpḌī hai

haqīqat meñ vo mahloñ se baḌī hai

tujhe kyā tū to hai ik jaltā sūraj

mujhe to apnī āñkhoñ kī paḌī hai

hazāroñ rang se hai jalva-farmā

mohabbat zindagī hai phuljhaḌī hai

qadam-bosī ko barkhā-rut kī mālan

mire dar par liye gajre khaḌī hai

hamāre rahbaroñ kā asl chehra

'ajā.ib-ghar meñ rakkhī khopDī hai

banāyā diin ko hai jab se maz.hab

sabhī ko sirf baḳhshish kī paḌī hai

kisī ke rū-barū rahnā bhī 'ḳhālid'

nihāyat āzmā.ish kī ghaḌī hai

jo ulfat ki bina par jhonpDi hai

haqiqat mein wo mahlon se baDi hai

tujhe kya tu to hai ek jalta suraj

mujhe to apni aankhon ki paDi hai

hazaron rang se hai jalwa-farma

mohabbat zindagi hai phuljhaDi hai

qadam-bosi ko barkha-rut ki malan

mere dar par liye gajre khaDi hai

hamare rahbaron ka asl chehra

'ajaib-ghar mein rakkhi khopDi hai

banaya din ko hai jab se mazhab

sabhi ko sirf baKHshish ki paDi hai

kisi ke ru-baru rahna bhi 'KHalid'

nihayat aazmaish ki ghaDi hai