jo us be-rahm par apna dil-e-KHana-KHarab aaya

jo us be-rahm par apnā dil-e-ḳhāna-ḳharāb aayā

ga.e sabr-o-tahammul hosh-o-tāqat iztirāb aayā

havā badlī ghaTā chhā.ī vo bārish kā sahāb aayā

magar ab tak na ai pīr-e-muġhāñ daur-e-sharāb aayā

sar-e-mahshar vo yār-e-sho.ala-rū jab be-naqāb aayā

to ahl-e-hashr chīḳh uTThe zamīñ par āftāb aayā

sar-e-mahfil adū se vasl kā iqrār karnā thā

tumheñ kuchh bhī hayā aa.ī tumheñ kuchh bhī hijāb aayā

shab-e-furqat kisī ne bhī na mujh nākām ko pūchhā

na tum aa.e na maut aa.ī na sabr aayā na ḳhvāb aayā

jafā-jū sañg-dil be-rahm hai va.ada-shikan hai vo

tū aayā bhī to kis par ai dil-e-ḳhāna-ḳharāb aayā

ġhazab hai yaar ne sar kaaT kar bhejā hai qāsid kā

javāb aayā hamāre naame kā to ye javāb aayā

huī tauba bhī TukḌe TukḌe misl-e-sāġhar-o-mīnā

hamāre sāmne ai shaiḳh jab daur-e-sharāb aayā

jo chhū lī zulf-e-pur-ḳham maiñ ne barham ho ga.e mujh se

hañsī kī baat thī sāhab magar tum ko itaab aayā

khulā sab haal ham par is jahāñ kī be-sabātī kā

miTā sat.h-e-samandar par ubhar kar jo habāb aayā

abhī tak hai vahī ġhaflat safedī bāloñ par aa.ī

uTho bahr-e-ḳhudā 'sābir' ki sar par āftāb aayā

jo us be-rahm par apna dil-e-KHana-KHarab aaya

gae sabr-o-tahammul hosh-o-taqat iztirab aaya

hawa badli ghaTa chhai wo barish ka sahab aaya

magar ab tak na ai pir-e-mughan daur-e-sharab aaya

sar-e-mahshar wo yar-e-shoala-ru jab be-naqab aaya

to ahl-e-hashr chiKH uTThe zamin par aaftab aaya

sar-e-mahfil adu se wasl ka iqrar karna tha

tumhein kuchh bhi haya aai tumhein kuchh bhi hijab aaya

shab-e-furqat kisi ne bhi na mujh nakaam ko puchha

na tum aae na maut aai na sabr aaya na KHwab aaya

jafa-ju sang-dil be-rahm hai wada-shikan hai wo

tu aaya bhi to kis par ai dil-e-KHana-KHarab aaya

ghazab hai yar ne sar kaT kar bheja hai qasid ka

jawab aaya hamare name ka to ye jawab aaya

hui tauba bhi TukDe TukDe misl-e-saghar-o-mina

hamare samne ai shaiKH jab daur-e-sharab aaya

jo chhu li zulf-e-pur-KHam main ne barham ho gae mujh se

hansi ki baat thi sahab magar tum ko itab aaya

khula sab haal hum par is jahan ki be-sabaati ka

miTa sath-e-samandar par ubhar kar jo habab aaya

abhi tak hai wahi ghaflat safedi baalon par aai

uTho bahr-e-KHuda 'sabir' ki sar par aaftab aaya