jo wahm hai Dar hai pas-e-parda nahin nikla

jo vahm hai Dar hai pas-e-parda nahīñ niklā

bastī se abhī tak vo bagūlā nahīñ niklā

hinda kī tarah jism udheḌā thā havā ne

lekin mire siine se kaleja nahīñ niklā

kuchh ham tire me.aar pe puure nahīñ utre

kuchh tū bhī ki mash.hūr thā jaisā nahīñ niklā

go shahr meñ paimā.ish-e-qad aam hai lekin

ik shaḳhs bhī ham-qāmat-e-sāya nahīñ niklā

poshāk-e-rafū-kār ke kyā kahne ki 'aḳhtar'

ik taar garebān meñ apnā nahīñ niklā

jo wahm hai Dar hai pas-e-parda nahin nikla

basti se abhi tak wo bagula nahin nikla

hinda ki tarah jism udheDa tha hawa ne

lekin mere sine se kaleja nahin nikla

kuchh hum tere mear pe pure nahin utre

kuchh tu bhi ki mashhur tha jaisa nahin nikla

go shahr mein paimaish-e-qad aam hai lekin

ek shaKHs bhi ham-qamat-e-saya nahin nikla

poshak-e-rafu-kar ke kya kahne ki 'aKHtar'

ek tar gareban mein apna nahin nikla