جو وحشت کی یہی ہے کار فرمائی تو کیا ہوگا

جو وحشت کی یہی ہے کار فرمائی تو کیا ہوگا

خزاں آئے تو کیا ہوگا بہار آئی تو کیا ہوگا

مرے تار گریباں سے صدا آئی تو کیا ہوگا

ہوئی جامہ دری سے ان کی رسوائی تو کیا ہوگا

ہے خود بینی کی واعظ کار فرمائی تو کیا ہوگا

جو ہو کر آگہی بھی کچھ نہ کام آئی تو کیا ہوگا

شب ہجراں ستارے بھی تو آنکھیں پھیر لیتی ہیں

بلا ہو جائے گی جب شام تنہائی تو کیا ہوگا

غرور حسن میں آئینہ دیکھو گے تو کیا لو گے

رہے گی جب نہ باقی شان یکتائی تو کیا ہوگا

جناب شیخ میخانے میں واعظ بن کے آتے ہیں

نکل آئے جو رندوں سے شناسائی تو کیا ہوگا

کرو گے کیا جو ہر پھر کر کسی کی یاد پھر آئی

پرانی چوٹ اگر دل پر ابھر آئی تو کیا ہوگا

مسرت ہے دل مضطر کو فصل گل کی آمد پر

طبیعت فصل گل میں اور گھبرائی تو کیا ہوگا

مصور مہوشوں میں سوچ لے انجام کار اپنا

کوئی تصویر اگر دل میں اتر آئی تو کیا ہوگا

نشاط زندگی تو راس آتی ہی نہیں مجھ کو

نہ کی آخر کو غم نے بھی پذیرائی تو کیا ہوگا

ذرا سوچو عداوت ہے تمہیں ایسی جو خوشترؔ سے

کبھی خوشترؔ کے دل میں بھی یہ بات آئی تو کیا ہوگا