jo wahshat ki yahi hai kar-farmai to kya hoga

jo vahshat kī yahī hai kār-farmā.ī to kyā hogā

ḳhizāñ aa.e to kyā hogā bahār aa.ī to kyā hogā

mire tār-e-garebāñ se sadā aa.ī to kyā hogā

huī jāma-darī se un kī rusvā.ī to kyā hogā

hai ḳhud-bīnī kī vaa.iz kār-farmā.ī to kyā hogā

jo ho kar āgahī bhī kuchh na kaam aa.ī to kyā hogā

shab-e-hijrāñ sitāre bhī to āñkheñ pher letī haiñ

balā ho jā.egī jab shām-e-tanhā.ī to kyā hogā

ġhurūr-e-husn meñ ā.īna dekhoge to kyā loge

rahegī jab na baaqī shān-e-yaktā.ī to kyā hogā

janāb-e-shaiḳh maiḳhāne meñ vaa.iz ban ke aate haiñ

nikal aa.e jo rindoñ se shanāsā.ī to kyā hogā

karoge kyā jo hir-phir kar kisī kī yaad phir aa.ī

purānī choT agar dil par ubhar aa.ī to kyā hogā

masarrat hai dil-e-muztar ko fasl-e-gul kī aamad par

tabī.at fasl-e-gul meñ aur ghabrā.ī to kyā hogā

musavvir mahvashoñ meñ soch le anjām-e-kār apnā

koī tasvīr agar dil meñ utar aa.ī to kyā hogā

nashāt-e-zindagī to raas aatī hī nahīñ mujh ko

na kī āḳhir ko ġham ne bhī pazīrā.ī to kyā hogā

zarā socho adāvat hai tumheñ aisī jo 'ḳhushtar' se

kabhī 'ḳhushtar' ke dil meñ bhī ye baat aa.ī to kyā hogā

jo wahshat ki yahi hai kar-farmai to kya hoga

KHizan aae to kya hoga bahaar aai to kya hoga

mere tar-e-gareban se sada aai to kya hoga

hui jama-dari se un ki ruswai to kya hoga

hai KHud-bini ki waiz kar-farmai to kya hoga

jo ho kar aagahi bhi kuchh na kaam aai to kya hoga

shab-e-hijran sitare bhi to aankhen pher leti hain

bala ho jaegi jab sham-e-tanhai to kya hoga

ghurur-e-husn mein aaina dekhoge to kya loge

rahegi jab na baqi shan-e-yaktai to kya hoga

janab-e-shaiKH maiKHane mein waiz ban ke aate hain

nikal aae jo rindon se shanasai to kya hoga

karoge kya jo hir-phir kar kisi ki yaad phir aai

purani choT agar dil par ubhar aai to kya hoga

masarrat hai dil-e-muztar ko fasl-e-gul ki aamad par

tabiat fasl-e-gul mein aur ghabrai to kya hoga

musawwir mahwashon mein soch le anjam-e-kar apna

koi taswir agar dil mein utar aai to kya hoga

nashat-e-zindagi to ras aati hi nahin mujh ko

na ki aaKHir ko gham ne bhi pazirai to kya hoga

zara socho adawat hai tumhein aisi jo 'KHushtar' se

kabhi 'KHushtar' ke dil mein bhi ye baat aai to kya hoga