jo wasf rakkha hai wo be-misal rakkha hai

jo vasf rakkhā hai vo be-misāl rakkhā hai

bashar meñ apnā ḳhudā ne jamāl rakkhā hai

unheñ to baḳhshī haiñ ḳhushiyāñ banāne vaale ne

hamāre vāste ranj-o-malāl rakkhā hai

har ek lamha na.ī āfateñ utartī haiñ

hamārā kitnā falak ne ḳhayāl rakkhā hai

hamārī bazm meñ aao to ġhair se bhī milo

ye mere sāmne us ne savāl rakkhā hai

ye kis ke dhoke meñ maiḳhāne aa ga.e vaa.iz

amaañ meñ ham haiñ tumheñ bhī sañbhāl rakkhā hai

kuchh apne jaib-o-garebāñ kī sudh to le 'sāqī'

banā ke tū ne ajab apnā haal rakkhā hai

jo wasf rakkha hai wo be-misal rakkha hai

bashar mein apna KHuda ne jamal rakkha hai

unhen to baKHshi hain KHushiyan banane wale ne

hamare waste ranj-o-malal rakkha hai

har ek lamha nai aafaten utarti hain

hamara kitna falak ne KHayal rakkha hai

hamari bazm mein aao to ghair se bhi milo

ye mere samne us ne sawal rakkha hai

ye kis ke dhoke mein maiKHane aa gae waiz

aman mein hum hain tumhein bhi sanbhaal rakkha hai

kuchh apne jaib-o-gareban ki sudh to le 'saqi'

bana ke tu ne ajab apna haal rakkha hai